Guías
Volver a Catálogos
EMPRESAS CONSERVADORAS DE ASCENSORES
Este catálogo recolle os trámites necesarios para a constitución e posta en marcha das iniciativas empresariais relativas ás actividades de empresas conservadoras de ascensores.
Considérase empresa conservadora de ascensores a persoa física ou xurídica que desenvolva as actividades de mantemento, reparación e modificacións importantes dos ascensores obxecto do Regulamento de aparellos de elevación e manutención, aprobado polo Real decreto 2291/1985, do 8 de novembro e a Instrución Técnica Complementaria AEM 1 “Ascensores”.
Neste catálogo enténdese como ascensor todo aparello de elevación instalado permanentemente en edificios ou construcións que sirva niveis definidos, cun habitáculo que se desprace ao longo de guías ríxidas e cuxa inclinación sobre a horizontal sexa superior a 15 graos, destinado ao transporte de:
- Persoas
- Persoas e obxectos
- Só obxectos se o habitáculo é accesible, é dicir, se unha persoa pode entrar nel sen dificultade e se está provisto de órganos de accionamento situados dentro do habitáculo ou ao alcance dunha persoa situada dentro do mesmo.
Están incluídos tamén os aparellos de elevación que se despracen seguindo un percorrido fixo, aínda que non estea determinado por guías ríxidas.
Antes de comezar as súas actividades como empresas conservadoras, as persoas físicas ou xurídicas que desexen establecerse en España deberán presentar ante o órgano competente da comunidade autónoma onde se establezan unha declaración responsable na que o titular da empresa ou representante legal desta declare para que categoría e, de ser o caso, modalidade vai desenvolver a actividade, que cumpre cos requisitos que se exixen na normativa de aplicación, que dispón da documentación que así o acredita, que se compromete a mantelos durante a vixencia da actividade e que se responsabiliza de que a execución das instalacións se efectúa de acordo coas normas e requisitos que se establecen na antedita instrución técnica complementaria.
A consellería competente en materia de industria asignará, de oficio, un número de identificación á empresa que presentou unha declaración responsable.
Realizado este proceso, a empresa queda habilitada e pode exercer a actividade de xeito inmediato, aínda que pode ser obxecto dos labores de inspección correspondentes para comprobar a veracidade do declarado mediante a achega da documentación que sustenta a declaración.
Real decreto 2291/1985, do 8 de novembro, polo que se aproba o Regulamento de aparellos de elevación e manutención e a súa Instrución Técnica Complementaria (AEM 1 “Ascensores” aprobada polo Real decreto 88/2013, do 8 de febreiro).
Decreto 51/2011, do 17 de marzo, polo que se actualiza a normativa en materia de seguridade industrial na Comunidade Autónoma de Galicia para a súa adaptación á Directiva 2006/123/CE.
